شعر : جهير الجرفين
في عيد الاضحى زاورتنا هويّا
حرمة كبيرة سن في وجهها نور
يامرحبا وسهلًا تعالي هنيّا
وجدتي تهلي تراحيب وسرور
يالله تحييه الصديق الوفيا
مايلحقه منا مشاريه وقصور
تقول من هذي وهذي وذيّا
قامت تعرف كل وحدة على الدور
تقول من ذي كن ذا زول ريّا
ماتدري ان الغالية وسط القبور
راحت وقلبي لفقدها ماتهيا
راحت وحطوا من ورى قبرها سور
سورٍ طويل وما ورى السور شيّا
غير الذي ندعي لهم ليل وبكور
ياليت في بيتي لريّا سميّا
لفرش لماطاها رياحين وزهور
وياليت في الدنيا شبيهٍ لريا
وريحٍ مثل عودٍ ومسكٍ وكافور
عاشت وسط قلبي وليفٍ صفيّا
عشنا معاها أيام وسنين وشهور
كانت كما العينين واغلا شويّا
ياليت عمر الغالية طول دهور
لكنه المكتوب لو عفت عيّا
الله يجبر من لها قلب مكسور
ياسامعين الهرج ندعي سويّا
لحوريةٍ الجنة كما الدر منثور
تاخذ هداياها صباح وعشيا
على صواني من ذهب نور في نور
ياجعلها في جنة الخلد ريا
متنعمة فيها ومن حولها الحور
في جنة الفردوس تمشي وتفيا
وقبرها برد وسلامات وحبور
