جمع الأموال قضية جنائية

صاحب عزيز يقص القصة ويروي الحكاية
يقول صاحبي الحمد لله من قبل ومن بعد
قبل أسبوعين توجب عليه تجدد رخصة القيادة لانتهاء صلاحيتها، و قمت بالإجراء عن طريق ابشر بعد سداد الرسوم، وحين دخول منصة أبشر طلع لي رسالة راجع المرور . وقد تعجبت من تلك الرسالة وهممت بمراجعة المرور فوراً . إلا أن الوقت أزف على نهاية الدوام الرسمي وقررت البقاء إلى يوم غد .
وفي اليوم الثاني راجعت المرور وسألت عن فحوى الرسالة، وقالوا عليك ايقاف خدمات ومنع من السفر!!
قلت ليش ؟؟
قالوا عليك بلاغ من شرطة النزهه غير معروف .
قلت فين موقع القسم ؟؟
قال لي العسكري جنب سجن بريمان …
رحت القسم وانا اتنافض وجالس افكر وش قد سويت من مصيبه ومين اشتكاني ولا لي خبرة بالاقسام والشرط والشكاوي ولاعمري دخلتها (( رجل مسالم )) ..
وصلت للقسم وترددت في الدخول ولكني قويت قلبي ودخلت ورحت قسم الحاسب الآلي استعلم عن البلاغ …. ..
يقول صاحبنا …
دخلت القسم وقابلت موظف الحاسب وانا ارجف وحلقي ناشف واعطيته بطاقتي قلت خير انشاء الله…
وش الموضوع ؟؟
كتب لي ورقه صغيرة فيها رقم وتاريخ وقال اطلع للملازم فلان موضوعك عنده …
قلت طيب وش هو الموضوع ؟؟
قال ماادري روح للملازم وهو يعلمك .
وهنا يقول صاحبنا زادت الحيرة وتوترت بشكل غير اعتيادي واخذت الورقه …وطلعت مع الدرج وطالعت الا ومكتوب في اسفلها
( جمع تبرعات ) …
وبردت اعصابي وهديت قلت الحمد لله…بس كذا …بسيطه ..وخرجت من القسم وأجريت بعض الإتصالات للاستفهام والاستيضاح على واحد معرفه وصديق مقرب عن الإجراء القانوني في ذلك، ورجعت للضابط وصار يحقق معي وقدامه ملف ضخم فيه كشوفات حساباتي الشخصية وحساب شركتي وقال إن الجهات المختصة لاحظت وجود مبالغ بشكل مستمر ومن أفراد عده، تدخل حساباتك وتخرج تحت مسمى تبرعات واعانات واعمال خيرية …

وطلع الضابط شخص واعي ولبق وعلمته بالسالفه شفهياً، بكل صدق وقلت يااخي هذي تبرعات ومساعدات من اقاربي ومن جماعتي اهل القرية الفلانية …يثقون بشخصي ويحولون على حساباتي وانا ازيد عليها من عندي واوصلها للارامل والمطلقات والفقراء من جماعتي اهل القرية بإشراف العريفه (( نائب القبيلة )) والموامين وكل شيء مثبت عندي ..
قال بس برضه هذا ممنوع حسب النظام …
قلت توبه …لك علي ماعاد اتصدق بريال واحد …
طيب وش العقوبه؟؟
قال حسب النظام سجن سنتين او غرامه 2 مليون ريال لكن الله يساعدك …
بيجيك اتصال من الجهه المختصة، وهناك بيحققون معك اللجنة وضروري تروح لهم …قلت حاضر وكتبت تعهد بالحضور ..

ختاماً أتمنى أن ينتهي موضوع صاحبنا بكل يسر، لأنني أعلم وأثق في نواياه الصادقة وحسه الإجتماعي بين أهله وأقاربه، في مساعدة المضطرين والمعوزين والمطلقات والأرامل وأسرهم المحتاجه .
والرسالة للجميع بأن جمع التبرعات خارج المنظمات المصرح بها من قبل الجهات الرسمية يعد جريمة يعاقب عليها القانون بالسجن أو الغرامة المالية أو كلاهما معاً . وحتى لا تدخل في تهمة وقضية أنت في غنى عنها .

كاتبه / مهدي آل عثمان